Jólagjöf frá...

.... mér til mín er komin í hús. Ég var ekkert að vesenast með að geyma gjöfina eitthvað heldur spændi upp pakkann í mikilli tilhlökkun og váááá.....  I´m in Love

Ég er búin að sjá svo marga flotta púða á hinum ýmsu síðum og er Dossa sérstaklega dugleg að sýna okkur margt fallegt. Maður fær alveg kaupsting við að sjá allt þetta fallega dót.

En svo var ég að vafra inná www.aliexpress.com um daginn í fyrsta skiptið því maður var að heyra annan hvern mann tala um þessa síðu og þá rakst ég á þessa dásemd.

Ég var sko ekki lengi að næla mér í þá. Mér finnst þeir svoooo fallegir.

Svo er bara spurning á ég að hafa þá hér í stofunni?

Eða í sjónvarpsholinu?

Hvað finnst ykkur? Hvar njóta þeir sín betur?

Svo var ég víst ein af fáum sem náði að næla sér í svona flottan bakka í RL.

Hann er bara æði og svo er skál í stíl, fínt fyrir smákökurnar með sjónvarpsglápinu á kvöldin.

En hvað segiði; í stofunni eða sjónvarpsholinu? Hvaða púði er uppáhalds? 

Persónulega er ég alltaf rosalega veik fyrir uglum en ég get heldur ekki staðist flott hreindýr.

Munið að skilja eftir ykkur spor, það er svo gaman að sjá hverjir eru að skoða.

Jólaknús 

Birna

Veikindi á veikindi ofan...

.... þannig er nú bara staðan á mínu góða heimili. Elsti búinn og tók það fljótt af, miðjan nýbúin en litla greyið mitt ætlar ekki að ná sér. Það er komið á aðra viku núna sem hann er með þessa blessuðu magapest.

En broskallinn hættir samt ekkert að brosa. 

Mamman er hinsvegar að verða buguð af þreytu og vöðvabólgu, gott svona korter í jól. Ég sem ætlaði að gera svo margt en það koma jú jól fyrir því. Ég vona bara svo innilega að hann fari að hressast litli kallinn minn. Það er ekkert verra en að horfa uppá þau þegar þeim líður illa.

Við náðum nú samt sem áður að mála piparkökurnar og piparkökuhúsin seinustu helgi.

Elsti minn búinn að missa sínar fyrstu tennur, seinni var að detta úr í fyrradag :)

Þeir verða ekki mikið krúttlegri en þessi :)

Hér er afraksturinn okkar, allir strákarnir fengu að skreyta sitt piparkökuhús

Svo flott jólabörn

Annars er minn tími aðallega búinn að fara í veikindastúss en ég náði þó að pakka inn gjöfunum í gær og skrifa á nokkur jólakort. Síðan klippti ég líka út þessi sætu snjókorn í gluggana hjá okkur. 

Sá þetta hjá henni Stínu Sæm og þetta kemur svo vel út.

Eigið góðan dag

Knús

Birna

Afmæli í dag...

.... hjá yours truly og svo var líka haldið uppá 5 ára afmæli Ólivers Loga en hann á afmæli 11. júli. Fyrir 2 dögum var eldhúsið galtómt, allt eldhúsdótið í kössum (og við erum að tala um þvílíkt magn af kössum) og heimasætan ekkert búin að baka. En það vill til að ég er þokkalega skipulögð þannig að ég réðst í verkið á fimmtudagseftirmiðdegi. Bakaði kökur á meðan ég raðaði í skápa. Svo fékk ég þennan sæta aðstoðarkokk í morgun sem bjargaði mér alveg.

Síðan þurfti auðvitað að þrífa og svona aðeins flikka uppá stofuna. Ég gaf sjálfri mér fallegan ramma frá henni Dossu í Skreytum hús og hlakkaði svo til að setja hana á arinhilluna mína. Arininn er ekki alveg klár, á eftir að mála hann að innan og arinhillan var ólökkuð.... þannig að ég gerði það bara í snöggheitum og það kom svo svakalega vel út. Uppröðunin er ekkert klár en þetta er svona það sem ég hafði við hendina og skellti þarna upp fyrir veisluna.

Ég er alveg að elska þennan ramma, að sjálfsögðu eru ekki komnar í hann myndir frá mér ;) hehe þannig á meðan fá þessar að njóta sín. Bókina fékk ég í Húsasmiðjunni, glerkúpulinn keypti ég af konu á barnalandi og kertastjakann í Tiger. Spegilinn gerði ég upp, sjá hér og vasana man ég ekki alveg hvar ég fékk.

Þema afmælisveislu Ólivers að þessu sinni var hauskúpur en svo var líka búningaafmæli þar sem afmælisgestir mættu í búningum. Veislan var haldin í bílskúrnum hjá okkur sökum rigningar og það fór bara vel um þau þar. Það var svaka fjör og mikil ánægja hjá afmælisbarninu og afmælisgestum.

Inni í húsi fengu fullorðnir að sitja og veisluborðið var ekki af verri endanum.

Mikil spenna yfir pökkunum.

Svo var auðvitað að prófa allar gjafirnar.

Kominn í sparifötin og farinn í afmælisveislu nr 2 hjá bekkjarsystur sinni Hörpu. Tók smá syrpu af afmælisstráknum mínum. Hann er orðinn svo stór og fullorðinn allt í einu.

Algjör töffari

Meðgangan er hálfnuð en ég var komin 20 vikur í gær og bumban hefur tekið mikinn kipp seinustu viku. 

Dagurinn er bara búinn að vera rosalega góður og ég hlakka til að sýna ykkur betri myndir af eldhúsinu þegar ég er búin að taka til í eldhúsinu eftir veisluna ;) Ég lofa að það verður fljótlega.

Knús Birna afmælisstelpa

Borðstofustólarnir

Hér kemur fyrir og eftir mynd af "nýju" borðstofustólunum okkar. Ég gleymdi auðvitað að taka almennilega fyrir mynd en fann þessa og hún verður að duga. 

Hér koma svo nokkrar fleiri myndir af stólunum. Ég veit að ég er mjög brött að setja svona hvítt áklæði á stólana, kannski ekki beint barnvænt en ég er með ráð uppí erminni við því. Sýni það síðar.... en allavega er ég hrikalega ánægð með þá og þeir eiga eftir að vera rosalega flottir við borðið og ég tala nú ekki um bara í allt rýmið. 

Smáhlutir spreyjaðir

Ég safnaði saman nokkurm hlutum sem ég var orðin leið á og ætlaði að fara að losa mig við en með smá spreyj-eríi þá hafa þeir fengið endurnýjun lífdaga sinna. Hlakka svo til þegar ég fer að innrétta nýja húsið mitt með öllum þessum hlutum sem ég hef verið að flikka uppá.

Byrja á þessum búdda kertastjaka sem ég fékk í jólagjöf einu sinni en ég er voðalega hrifin öllum svona búddahlutum og kínadóteríi, ég hlýt bara að hafa verið asísk í fyrra lífi ;)

Mig langaði að prófa að breyta um lit á þeim og prófaði að spreyja þá hvíta. Ég er bara mjög svo sátt við þá núna.

Næst eru þessir englakertastjakar sem ég fann ofan í kassa hjá kærastanum, en hann vann þá víst einhvern tímann á Bingói en hafa aldrei verið notaðir.

Það voru fleiri týpur líka sem ég er ekki búin að spreyja en mér finnst þeir allavega fallegri núna og held ég muni frekar nota þá svona. Svo er aldrei að vita nema ég breyti um liti seinna meir þegar þeir eru komnir á sinn stað ;)

Blessuðu tréstytturnar mínar voru nú orðnar mjööööög þreyttar og upplitaðar.

En mér finnst þessar samt svo flottar alltaf svo ég prófaði að spreyja þá og pússa aðeins yfir þá til að gera þá svona shabby chic.

Síðast en ekki síst þá er það þessi hái kertastjaki sem mamma var með til sölu í versluninni sinni en seldist aldrei. Það var eitthvað við hann sem bara heillaði ekki, kannski var það liturinn.

Mér fannst hann samt alltaf flottur en það er nú líka ekkert að marka mig, ég er forfallinn kertastjaka aðdáandi hehe. Ég spreyjaði hann og svo keypti ég kertahring í versluninni Þristurinn á Ísafirði sem er æðisleg búð með alveg ótrúlega skemmtilegu úrvali fyrir heimilið. Ég var ekki viss hvort hann myndi passa á en ég tók áhættuna og hann er í alvörunni eins og sniðinn á hann. Mér finnst kertastjakinn alveg æði núna.

Ég læt þetta duga að sinni

Afsaka hvað ég set lítið inn þessa dagana....

.... en svo er mál með vexti að ég er nýbyrjuð að vinna eftir fæðingarorlof. Ég er að kenna í Grunnskóla og nú fer mestur tíminn í að tvinna saman vinnu og að vera ein að sjá um 2 börn þar sem maðurinn minn er yfirleitt í burtu við vinnu. En það er nú að komast rútína á okkur og þá hefur maður kannski meiri tíma ;)

Mig langaði allavega að sýna ykkur eitt verkefni sem ég er að vinna í. Ég keypti þennan hlut í Góða Hirðinum seinast þegar ég var í höfuðborginni:

Ég hafði hugsað mér að gera þetta að svona háum kökudiski (ég er alveg veik í fallega kökudiska ;) og setja glerdisk ofaná sem ég myndi spreyja einhverjum fallegum lit. En ég átti nú samt engan glerdisk til þess að setja á þannig að ég prófaði nokkrar hugmyndir, fékk glerdisk lánaðan hjá mömmu til að máta og er ennþá að melta þetta. Hvað finnst ykkur?

Mér fannst þessi með bambusdisknum koma svolítið flott út, ég er ekki búin að festa hann á en hann passar alveg akkurat ofan á, þannig að það er kannski meant to be????